Еліміздің негізінен мақта дақылын өсірумен айналысатын аграрлы аймағы – Жетісай ауданының диқандары үшін әрбір күн мен сағатты тиімді пайдалану өте маңызды. Мол табысқа жетуде уақытылы дән сеуіп, дер кезінде минералды тыңайтқыштарды беру, кешіктірмей егістікті сығару үлкен рөл атқарады. Тынымсыз еңбек өз нәтижесін берері де сөзсіз.
Ерте көктемнен таңның атысынан кештің батысына дейін егістік алқапта тынымсыз еңбек етіп, еңбексүйгіштіктің озық үлгісін көрсетіп келе жатқан жетісайлық шаруалар мақта терім науқанын бастап та жіберді. Өнімділік те жаман емес.
Маңызды науқанның басталуына орай аудан әкімі Серік Үсенұлы Мамытов егістік алқапқа арнайы барып, шаруалармен тілдесті. Қытайлық сорттың өнімділігі мен сапасын көрді. Тиімді тұстарын бірге талқылады.
Жетісай ауданында мақта терім науқанын алғашқы болып бастағандардың бірі осыдан 21 жыл бұрын диқаншылыққа ден қойып, несібесін Жер-Анадан жинауды кәсіп еткен Қызылқұм ауылдық округінде орналасқан «Айдар» шаруа қожалығының төрағасы Ербол Айтуғанов.
Қарамағындағы 14 гектар жерге Қытайдың «60» сортының шитін сепкен шаруа биыл гектарынан орта есеппен 50 центнерден өнім алуды жоспарлап отыр. Өйткені, бұл сорттың бұған дейінгі мақта сорттарына қарағанда талшығы көп, шиті аз. Агротехникалық шаралары дұрыс жүргізілсе мол өнім алу мүмкіндігі де жоғары. Жаңа сорттың мол өніміне сенім артып, өткен жылы лизингке 1 комбайн мен 3 трактор алған Ербол баға дұрыс болса дегенді айтады.
Сондай-ақ, «Айдар» шаруа қожалығының төрағасы Ербол Айтуғанов. «Ағын судан, минералды тыңайтқыштардан биыл қиындық көрмеуіміздің нәтижесінде өнімділік жақсы. Алдын біз «Сұлтан», «Мақтаарал», «Бұқара» деген сорттарды егетін едік. Өнім 20-25 центнерді құрайтын, құрт жейтін. Ал биыл Қытайдың «60» деген сортын ектік, құрт та жемеді. Сәтін салса гектарынан 50 центнерге дейін өнім аламыз деп жоспарлап отырмыз» дейді.
Ағымдағы жылы ауданның 79,3 мың гектар суармалы жерінің 40,8 мың гектарына мақта шиті егіліп, қазірдің өзінде 200 тоннаға жуық мақта терілген. Науқанға 715 дана тракторлар мен 897 дана трактор тіркемелерін, 61 дана ОВХ мен 232 дана мақта терім машиналарын жұмылдыру көзделген.
Осы жерде айта кетерлігі өткен жылы 45 мың гектарға мақта шитін сеуіп, 122 мың тонна ақ ұлпа жинаған жетісайлық шаруалар биылғы жылы да сол межені орындауға ниетті. Өйткені, өнім сапасын арттырып, ағын суды үнемдеудің тиімді технологиясы саналатын тамшылатып суғару әдісі биылдың өзінде 2 мың гектарға артқан. Оның 300 гектардан астамы мақта дақылын өндірушілердің еншісінде.
АУДАНЫМЫЗДА МАҚТА ТЕРІМ НАУҚАНЫ БАСТАЛДЫ