Білімнің негізгі іргетасы бастауышта қаланады десек, бастауыштың табалдырығын жаңа аттаған жас бүлдіршін қолына ең алдымен Әліппені махаббатпен ұстайды.
Әліппе тек білімнің бастауы емес, тәрбиенің де қайнар бұлағы. Бастауыш сынып мұғалімі ретінде мен бұл сөздерді нық сеніммен айта аламын. Менің шәкірттерім жақында «Әліппемен» қоштасты.
Әліппемен қимай қоштастық. Әліппе тек 42 әріпті үйретіп қана қоймай, Отан,Ана,Ата, Дос,мектеп, жақсы мен жаман, адалдық, жалқаулықтың не екенін ұғындырып, шәкірттерімнің бойы мен ойы қатар өсіп дамуына зор ықпал еткен киелі оқу құралы. Өткізілген шарада оқушыларым алты айда тәрбиенің қайнар бұлағымен сусындап, әріптен сөз,сөзден сөйлем,сөйлемнен мәтін құрауды жетік меңгеріп шыққандарын ерекше көрсете алды.
Ертегілерді тыңдай отырып, өздерінің жеке көзқарастарын білдіруді, ертегіден тәлім -тәрбие алуды меңгергендерін де көрсете білді. Жас бүлдіршіндер жас шыбық сияқты. Қалай баулысақ, солай өседі. Шәкірттерімнің тал шыбықтай бұралып билеп, бұлбұлдай сайрап ән айтып, рөлдерге еніп ертегі саханалстыра алатындай дәрежеге жетуі де тәрбие мен білімнің ұштасуының ықпалы екендігінің дәлелі. Әліппеге мың алғыс айта отырып, шәкірт тәрбиелеуде тәрбие бағытынан адаспай тура жүруде де Әліппенің бергені мол екенін барынша ұғындырдым деп ойлаймын. Шәкірттеріміздің алар асуы мен шығар биігі мол болсын!
М.АҚЫЛБЕКОВА,
№44 «Жаңа дала» ЖББМ КММ бастауыш сынып мұғалімі.