Елімізде жыл басынан бері көпбалалы отбасыларға берілетін мемлекеттік жәрдемақымен орта есеппен 576,4 мың отбасы жалпы сомасы 348,9 млрд. теңге мөлшерінде қамтылған, оның ішінде қыркүйек айында 525,9 мың отбасына 35,2 млрд теңге мөлшерінде жәрдемақы төленді. Мұндай жәрдемақыны алғандардың тізімінде біздің Жетісай ауданындағы отбасылар бары анық. Себебі, ауданымыз көпбалалы отбасылар саны жағынан елімізде алдыңғы қатарларда тұратыны анық.
Осы аталмыш мемлекеттік жәрдемақыға бірге тұратын 4 және одан да көп кәмелетке толмаған немесе 23 жасқа дейінгі күндізгі бөлімде оқитын студент балалары бар отбасылар табысына қарамастан үміткер бола алады.
Төлем мөлшері бала санына қарай есептеліп төленеді және 2024 жылы:
– 4 баласы бар отбасыларға – 16,03 АЕК немесе 59 183 теңге;
– 5 балаға – 20,04 АЕК немесе 73 988 теңге;
– 6 балаға – 24,05 АЕК немесе 88 793 теңге;
– 7 балаға – 28,06 АЕК немесе 103 598 теңге;
– 8 және одан да көп баласы бар отбасыларға – әрбір балаға 4 АЕК немесе 14 768 теңге мөлшерінде төленеді.
2024 жылғы 1 қаңтардан бастап балалы отбасыларға тағайындалатын мемлекеттік жәрдемақылардың мөлшері 7 пайызға артқаны байқалып отыр. Ал биыл көпбалалы отбасыларға мемлекеттік жәрдемақы төлеуге 474 млрд. теңге қарастырылған.