Ұлттық және ат спорты түрлері орталығы 2023 жылдың қорытындысы бойынша аймақтардың рейтингін жариялады. Былтыр ұлттық спортты серік еткендер 11 спорт түрінен сайысқа түскен болатын. Жыл басынан бастап ұлттық спорт түрінен жекелеген ішкі чемпионаттар, кубок бәсекелері, ұлттық спорт фестивалі, халықаралық жарыстар мен әлемдік додалар өтті.
Бір жыл көлеміндегі жарыстар қорытындысы бойынша 17 облыс пен 3 қаланың арасынан Түркістан облысы үздік атанды. Оңтүстік өңірінің спортшылары былтырғы жарыстарда 58 алтын, 52 күміс, 65 қола жүлдемен көш бастады. Оның 13 алтынын түркістандықтар қазақ күресінен еншілеп, рекордтық көрсеткішті тіркеді.
Облыс әкімі Дархан Сатыбалдының қолдауымен спорт саласындағы көрсеткіштерді жақсарту бойынша жұмыстар жүруде. Қазіргі таңда Түркістан облысында 7 облыстық, 23 аудандық, 7 қалалық спорт мекемесінде ұлттық спорт түрлерінен бөлімшелер жұмыс істейді. Сонымен қатар облыстық дене шынықтыру және спорт басқармасы тарапынан жаттықтырушылар мен әдіскерлерге оқу-жаттығу сабақтарына әрдайым әдістемелік көмек көрсетілуде.
Ұлттық және ат спорты түрлері орталығы баспасөз қызметінің хабарлауынша, рейтингте екінші орынды Астана қаласы иеленді. Елордалықтар аталған жарыстардан 24 алтын, 19 күміс, 28 қола жүлде еншіледі. Ал үздік үштікті Шымкент қаласының спортшылары түйіндеді.
Енді биыл әр спорт түрінен ішкі біріншіліктер ұйымдастырылады. Жеңімпаздар халықаралық жарыстарда, Дүниежүзілік көшпенділер ойындарында ел намысын қорғайды.