Ұлттық бірыңғай тестілеу – білімді бағалаудың тиімді тәсілі. Қазір «бой жарыстыратын заман емес,ой жарыстыратын заман» деген ой әрбір түлектің санасында қалыптасқан. Барлық бітіруші түлек өз білімін сынап, жоғары оқу орнына оқуға түсіп, өзі қалаған маман иесі болғысы келеді.
Дегенмен, көптеген түлектер бұл сынақта өздерін дәрменсіз санап бойларын сенімсіздік билейді. Осы тұрғыда мектептегі педагог – психолог мамандары түлектердің бойындағы сенімсіздікті, үрей мен қорқынышты жеңу мақсатында түрлі тренингтер өткізу арқылы бойларына сенім мен талпыныс оятады. Мен де педагог – психолог ретінде мектебіміздегі биылғы 2024-2025 оқу жылындағы бітіруші түлектермен жоспарлы шараларды жүргізіп келемін.
Сондай шараның бірі «ҰБТ- ға сеніммен барайық!» тақырыбында өткен тренинг – сабағымды тілге тиек еткім келеді. Тренингтің мақсаты : Оқушылардың өзін тану арқылы өзіндік бағалауын қалыптастыра отырып, стресті жеңуге бағыттау. Психологиялық тренингті бірнеше бөліммен жүргіздім. Бастапқы бөлім «Мен қалаған есім» деген тақырыпта өткізілді.
Бұл кезеңде түлектер өздерін жақындары,достары, мұғалімдері қалай атағанын қалайтынын, қалай атағанда өздерін еркін,жайлы сезінетіндіктерін шеңбер болып отырып, еркін пікірлесе алды. Екінші кезеңде «Дембо Рубинштейн» әдістемесімен түлектерден «Өзін – өзі бағалау» тесті алынды. Үшінші кезеңде «Мен кіммін?» әдістемесі қолданылып, бұл кзеңде әр оқушы «Кеше кім?» «Бүгін кім?» «Ертең кім?» деген сұрақтарға өздері туралы пікірлерін шеңбер болып айтып шықты. Ойын толық жеткізе алмаған түлектерді жетелеуші сұрақтар арқылы қолдап отырдым. Төртінші кезеңде «Стресті қалай жеңуге болады?» ойынын ойнаттым. Бұл кезеңде түлектер өздерінің бойындағы ашудың келу жолы мен ашуды,үрейді жеңу жолдарын қарама – қарсы айта отырып, стресті жеңу жолдарын меңгеріп шықты. Тренинг соңында түлектер стрестің жиналу себептері мен оны шығару жолдарын жақсы меңгеріп, ҰБТ- ға дайындық барысында осы тәсілдердің тиімді екендігі туралы пікірлерін ортаға салды.
Жас түлек – еліміздің болашағы. Еліміздің болашағы жарқын болу үшін кез- келген тығырықтан жол тауып шыға алатын білімді, жан – жақты дамыған жеке тұлға қалыптастырып шығару кез- келген педагогтың басты міндеті екені біздің санамызда болу керектігін ұмытпайық,әріптестер!
Б.ТУКИБАЕВА,
№44 «Жаңа дала» ЖББМ КММ педагог-психологы.