Өрт қауіпсіздігін сақтау – өмір қауіпсіздігінің кепілі. Өрттің қай жерде, қашан орын алатыны белгісіз. Сондықтан да әрбір адам өрт қауіпсіздігі ережелерін толық біліп алуы міндетті. Осы мақсатта мен өз тобыма «Өрт тілсіз жау» тақырыбында тәрбие сағатын өткіздім.
Тәрбие сағаты барысында балаларға өрттің кез- келген жағдайда орын алуы мүмкіндігін, өрт шыққан жағдайда ол жерге жақындамау керектігін, өрт дегеннің өзі не екенін және өрт шыққанын байқаған бойда үлкендерге хабар беруін, мүмкіндігі болса «101» номеріне хабарласып, өрт сөндірушілерді шақыру керектігін түсіндіріп өттім.
Өрт көбінесе жаз мезгілінде ыстық күндерде, үйдегі газ құрылғыларының дұрыс жабылмауының салдарынан, кішкентай балалардың сіріңкемен ойнауы салдарынан орын алатындығына да тоқталып өттім.
Өрт болған жағдайда «Өрт сөндірушілер» өздерінің құрылғыларымен өртті сөндіретінін түсіндіріп өттім. Тәрбие сағатын өте отырып оқушылардың санасында «өрт» туралы түсінік қалыптасып, өрт қауіпсіздігін сақтау ережелері мен сақтану жолдары меңгерілді.
Балалар – біздің болашағымыз. Сондықтан да әрбір сабағымызда олардың өмір қауіпсіздігін сақтаудың жолдарын саналарына сіңіріп отыру біздер, тәрбиешілердің басты парызымыз екенін ұмытпауымыз керек.
Қ.ЕСЕНБЕКОВА,
№44 «Жаңа дала» ЖББМ КММ МАДТ тәрбиешісі.