«Баланы тәрбиелеу үшін әрбір тәрбиешінің өзі тәрбиелі болуы керек. Себебі бала айтып ұқтырғаннан гөрі, көргеніне көп еліктегіш келеді. Солай болған соң балаға не жақсы мінез болсын, іспен көрсету керек», — дейді Жүсіпбек Аймауытов. Осы бір ұлағатты сөз астарында отбасында ата-анасынан, мектепке дейінгі ұйымда тәрбиешіден талап етілетін тағылым жүгі жатыр.
Қазір ұлттық тәрбие балабақшада кеңінен насихатталып, көрсетіліп жүр. Бала бойына ұлттық тәрбие мен білімді кішкентайынан сіңіруі қажет.
Бала – біздің болашағымыз. Болашағымыздың ертеңі бұлыңғыр болмауы үшін қазірден тілін, ділін, кім екенін ұғындырғанымыз жөн.
Балабақшадағы балаларды:
«Ойната отырып тәрбиелейміз»;
«Ойната отырып оқытамыз».
Ұлттық құндылықтарды балаларға насихаттау арқылы оларды отансүйгіштікке, елін-жерін қорғауға, үлкенге құрмет, кішіге ізет жасауға баулуға болады. Сондықтан ұлттық ойындар мазмұны мен түрлеріне қарай оқу іс-әрекетінде үлкен қолдауға ие бола алады.
Қазақ халқының ежелден келе жатқан ойындарының көбі – асық арқылы ойналатын ойындар.
«Асық» дегеніміз не? Оны қайдан аламыз? Әртүрлі түске қалай бояймыз? Осы сұрақтар қазіргі заманауи балаларға таңсық.
Себебі отбасында ата-аналар да балаларына айтып отырмайды. Гаджеттен әртүрлі пайдасыз ойындар ойнап өскен баладан ұлт болашағын көру мүмкін бе?
Міне, осы олқылықтардың алдын алу үшін балабақшада ұлттық құндылықтарымызбен бала тәрбиелеуді қолға алып келе жатырмыз.
Асық – табиғи сүйек болғандықтан, бала денсаулығына зияны жоқ.
Кіп-кішкентай асықтан оқу іс-әрекетіне көптеген тапсырмалар жасауға болатынын дәлелдеп жүрміз.
Балаларға да өте қызықты.
Сондай-ақ балабақшамызда әр сәрсенбі «Ұлттық киім күні» болып бекітілді.
Жансұлу МЫРЗАЛИЕВА,
«Жан-балапан» бөбекжай балабақшасының әдіскері.