Салауатты өмір салты — бұл ең әуелі денсаулықты сақтауға және нығайтуға бағытталған сауықтыру жолындағы белсенді іс-әрекет. Өмірде адамның өмір салты өздігінен қалыптаспайды, ал салауатты өмірсалты өмір сүру барысында мақсатты түрде қалыптасады.
Қазіргі мәліметтер бойынша денсаулық 53-55%- ға салауатты өмір салтына тәуелді болады екен. Бұдан салауатты өмір салтын ұстанудың қаншалықты маңызды екендігі айқын. Осы мақсатта мектебімізде жасөспірімдердің салауатты өмір салтын сақтай отырып, спорт түрлеріне қызығушылығын оятуда түрлі үйірмелер жұмыс жасайды. Соның ішінде қыздар арасындағы футбол ойыны.
Мектебімізде 5-6- сынып қыздарынан құрылған футбол командасы бар. Осы командамен тынымсыз еңбектене отырып, жаттықтыра келе 2024/2025 оқу жылында ауданды лигада І орынға иелендік.
Жүлделі І орын футбол сүйер қыздарымызды шабыттандырды. Сарыағаш қаласында өткен Аймақтық лигада тағы да І орынды иеленіп, облыстық лигаға жолдама алдық. Бұл біздің мектебіміз үшін үлкен жетістік болды. Облыстық лига Түркістан қаласында өтті. Футболшы қыздарымыз бұл жарыста да өздерінің бар күш жігерлерін, өнерлерін салып ойынды жоғары деңгейде өткізді. «Жүзден жүйрік,мыңнан тұлпар» дегендей, қыздарымыз бұл сайыста жүлделі ІІ орынды иеленді.
Ерекше мақтаныш сезіммен мектебімізге келдік. Мектеп директоры Г.Умбетаева бастаған ұжым, оқушылар ерекше құрметпен күтіп алды. Қыздарымыз ойын кезіндегі өздерінің белсенділігін мақтана, қуана отырып әңгімелеп берді. «Боламын деген баланың бетін қақпа, белін бу» деген дана сөзді негізге ала отырып, жастарды спорт саңлақтары болып еліміздің көк туын желбіретіп, бойында патриоттық рухты оята алсақ өзімізді нағыз педагогпыз деп санар едік.
Қ.ТӨЛЕМАНОВ,
№ 44 «Жаңа дала» ЖББМ КММ дене тәрбиесі пәнінің мұғалімі.