Еліміздің болашағына қатысты маңызды шешімдер қабылданатын кезеңдерде халықтың пікірі ерекше маңызға ие. Осындай маңызды тетіктердің бірі – референдум. Референдум – азаматтардың ел тағдырына тікелей қатысуының, өз таңдауын еркін білдіруінің нақты көрінісі.
Біздің мемлекетіміз – Қазақстан. Тәуелсіздік алғаннан бері ел дамуында маңызды тарихи кезеңдер болды. Қасым-Жомарт Тоқаев ұсынған саяси жаңғыру бағыттары халық пікіріне сүйене отырып жүзеге асырылып келеді.
Референдум – бұл тек саяси науқан емес, ол – азаматтық жауапкершіліктің көрсеткіші. Әрбір дауыс – ел болашағына қосылған үлес. Біз, білім саласының өкілдері, жас ұрпаққа тек білім беріп қана қоймай, оларды саналы, отаншыл, белсенді азамат ретінде тәрбиелеуді мақсат етеміз. Сондықтан қоғамдағы маңызды оқиғаларға бейжай қарамау – баршамыздың ортақ міндетіміз.
Мектеп – тәрбие мен білімнің ордасы. Мұнда біз оқушыларға құқықтық мәдениетті, заңға құрметпен қарауды, азаматтық ұстанымды қалыптастыруды үйретеміз. Референдум секілді маңызды шаралар арқылы балаларымыз демократиялық құндылықтардың мәнін тереңірек түсінеді.
Еліміздің ертеңі – бүгінгі жас ұрпақтың қолында. Сондықтан әрбір ата-ана мен ұстаз елдік маңызы бар шешімдерге жауапкершілікпен қарап, үлгі көрсетуі қажет деп санаймын.
Береке-бірлігіміз нығайып, еліміз өркендей берсін!
Гульмира Әсілқызы Қуатбекова,
І.Есенберлин атындағы №54 жалпы білім беретін мектептің директоры.
Жетісай ауданы.