«Халықтың кемеліне келіп, өсіп өркендеуі үшін ең алдымен азаттық пен білім керек», – деп қазақтың біртуар перзенті Ш.Уалиханов айтып кеткеніндей, еліміз Тәуелсіздікке қол жеткізгеннен бері білім саласына ерекше көңіл бөлініп келеді. Әлемдік деңгейге көтеріліп, бәсекеге қабілетті елдер қатарынан көріну үшін функционалдық сауаттылығы мықты жасөспірімдерді тәрбиелеп шығуымыз керек.
Осы мақсатта әрбір мұғалім ағартушы педагог Ы.Алтынсариннің «Мұғалім – мектептің жүрегі» деген қағидасын негізге ала отырып, өзінің әдістемесін ұдайы жаңартып отыру керек деп ойлаймын. Республикалық, облыстық деңгейдегі білім жетілдіру курстары кез келген мұғалімге әдістеменің жаңа бағдарламаларын ұсынып отырады. Курс барысында тек теория жүзінде сусындап қоя салмастан, алған білімді тәжірибеде қолдану арқылы дамыту керектігін әрбір мұғалім өз міндеті деп санайды. Осындай міндеттер қатарына оқушының шығармашылығын дамыту, сыни ойлау дағдысын дамыту, оқушылардың танымдық қабілетін ұштау, сабақ барысында АКТ тиімді пайдалану сияқты міндеттерді жатқызуға болады. Тарих сабағында мен жаңа технологияларды тиімді қолдана отырып, оқушылардың пәнге деген қызығушыларын арттыруды басты мақсатым деп білемін. Еліміздің түп тарихын білу кез келген азаматтың парызы. Тарихты жасөспірімге таныту біздің міндетіміз. Интербелсенді әдістерді тиімді пайдалану арқылы оқушылар арасында бәсекелестік туындайды, бәсеке бар жерде нәтиже бар екені айдан анық. Сондай тәсілдердің бірнешеуін тілге тиек етер болсам, «Фишбоун», «Ассоциация», «Автор орындығы» әдістері сыни тұрғыдан ойлана отырып, өз ойларын еркін жеткізіп, бірін бірі бағалауда тиімділігін көрсетіп жүр. Сандық технологиялар заманында қазіргі әлеуметтік желілермен тығыз байланыста болып жүрген оқушылардың назарын білімге қарай бұру үшін «Жасанды интеллект» платфрмасының тиімділігіне қол жеткізіп жүрмін,тарихи тұлғаларды сол заманның тарихи әлеуметтік жағдайларымен таныстырып сөйлеткенде оқушылар сол заманның тарих қойнауына дендеп кіре алады.
Қорыта айтқанда, ХХІ ғасыр мұғалімі оқытудың барлық жаңа тәсілдерімен қаруланған мықты тұлға болған жағдайда ғана Тәуелсіз елдің болашағы жарқын болмақ.
Ж.ТЕМІРХАНҰЛЫ,
№44 «Жаңа дала» ЖББМ КММ тарих пәнінің мұғалімі.