Кешегі бағыт-бағдары белгісіз, бақандай он жылға созылған ауған соғысының қасіреті қазақстандықтарды да айналып өткен жоқ. Бір ғана, Мырзашөл топырағынан интернационалдық борышын өтеуге 253 жауынгер аттанып, оның 18-і жат жерде мерт болды. Ауғандық жауынгерлердің өз Отанына, еліне деген адал махаббаты, ерліктері әрдайым келер ұрпаққа ұран болып келеді. 
Жетісай ауданында «Ерлік мәңгі – ел жадында» айдарымен орталық саябақта өткен іс-шара ауған соғысында ерлікпен қаза топқан боздақтарға гүл шоқтарын қоюмен, 1 минуттық үнсіздікпен еске алумен басталды.
Кеңес әскерінің Ауған жерінен шығарылғанына 32 жыл толуына орай ұйымдастырылған салтанатты шарада Жетісай ауданы әкімінің орынбасары Серік Пірімбеков тәуелсіздік жолында сан ғасырлардан бері жаумен арпалысып, бүгінгі бейбіт заманды орнатып берген ата-бабамыз бен кешегі Ауған соғысында отансүйгіштіктің нағыз үлгісін көрсете білген боздақтардың теңдесі жоқ ерліктерінің керемет үлгілерін жас буынға дәріптеп, майдангерлерге аудан әкімі мен аудандық мәслихат хатшысының алғыс хаттарын табыс етті.
Ал, аудан өнерпаздары өз кезегінде кеш қонақтарына патриоттық әндер шырқап, мерекелік көңіл-күй сыйлады.
«Ерлік жасау дегеніміз – қолыңа қару алып, жауға қарсы шығу ғана емес, Отаныңа адал қызмет етіп, бойыңа біткен дарының арқылы еліңнің мерейін үстем ету де ерлікпен пара-пар. Сондықтан, қазақстанның әрбір азаматы бар күш-қайраты мен білімін туған жерін түлетуге жұмсауы тиіс. Іс-шараның көздеген мақсатының бірі осыны жастарға ұғындыру болды» дейді аудан әкімінің орынбасары Серік Пірімбеков.
Патриотизм – әр жастың бойында балабақша, мектеп қабырғасында қалыптасуы керек. Өкінішке орай, жалпы білім беретін мектептердегі оқулықтарда кешегі ҰОС, ауған соғысында ерен ерлік көрсеткен батырларлырымыз, қала берді 18 ғасырлардағы Жоңғар шапқыншылығы кезінде туған жерінің тұтастығы мен өз ұрпағының бақытты болашағы жолында қасық қаны қалғанша шайқасып, ұлан-ғайыр даламызды бізге аманттап кеткен ата-бабаларымыздың ерліктері туралы деректер тым аз. Оқулықтарда кеткен олқылықтарды осындай патриоттық маңызы жоғары іс-шаралармен толықтыру бүгінгі жастардың болашағын бағамдауда да үлкен рөлге ие.
АУҒАН СОҒЫСЫНЫҢ АРДАГЕРЛЕРІ АРДАҚТАЛДЫ